Innibos Sunbake Gholfdag
’n Dag van gholf, geselskap en ’n goeie doel
Die Innibos Sunbake Gholfdag is ’n jaarlikse hoogtepunt op die Innibos-kalender – ’n dag waar gholf, goeie geselskap en ’n goeie doel hand aan hand gaan.
Die gholfdag bied spelers, besighede en ondersteuners die geleentheid om ’n heerlike dag op die baan te geniet, nuwe kontakte te ontmoet en terselfdertyd ’n direkte bydrae tot die toekoms van jongmense in die Laeveld te maak.
Ten bate van die Innibos Opvoedkundige Trust
Alle inkomste uit borgskappe en vierballe word aangewend ten bate van die Innibos Opvoedkundige Trust. Die Trust ondersteun talentvolle, maar minderbevoorregte leerders uit die groter Mbombela-gebied deur beurse wat hulle in staat stel om hul hoërskoolloopbane te voltooi. Die beurse dek onder meer skool- en koshuisgelde, met verdere mentorskap en ondersteuning om leerders te help om hul volle potensiaal te bereik.
Dit is ’n fees vol kleur, kreatiwiteit en energie.
Die projek is tans in sy agtste jaar en het reeds ’n tasbare impak gemaak. Tot dusver is 58 beurse toegeken aan leerders wat akademiese vordering, leierskap en persoonlike groei toon. Die Trust bly toegewy aan langtermyn-belegging in jong mense en glo vas dat onderrig een van die kragtigste middele is om lewens te verander en volhoubare toekomsgeleenthede te skep.
Hoe kan jy deelneem of betrokke raak?
Of jy nou ’n gholfspeler, ’n besigheid of ’n entoesiastiese ondersteuner is – daar is ’n geleentheid om deel te wees van hierdie besondere dag en saam ’n verskil te maak.
Wil jy deelneem of betrokke raak?
Hou die Innibos-sosialemediaplatforms en ons webwerf dop vir aankondigings wanneer vierballe en borgskapgeleenthede beskikbaar raak. Plekke is gewild en geleenthede is beperk, so maak seker jy is eerste in die ry wanneer inskrywings open!
Slaan ’n paar houe. Bou nuwe bande. Belê in ’n jongmens se toekoms.